الوهراني مترشح للبلدية…كلشي يمشي فالرمشي

في صباح وهراني عادي، غير عادي…
يفيق “السي عبد القادر الوهراني” على صوت زوجته:

– “نوض يا راجل! اليوم تبدا الحملة الانتخابية تاعك!”
– “حملة؟! أنا غير البارح قررت نترشح!”
– “هاو… عندك 24 ساعة باش تولّي من مواطن بسيط إلى رجل دولة!”

يخرج الوهراني من الدار، لابس قشّابية فوق كوستيم 1/2 مونش… نصّو تقليدي نصّو رسمي، كيما برنامجو بالضبط.

 المشهد الأول…إعلان الترشح

يجمع صحابه في القهوة:

– “يا جماعة… قررت نترشح للبلدية!”
– واحد يرد: “وعلاش؟”
– الوهراني: “باش نغيّر!”
– الثاني: “واش تغيّر؟”
– “نشوف من بعد… المهم نبدأ!”

يصفّقوله قاع… مشي اقتناع، غير على خاطر جاب لهم قهوة على حسابه.

المشهد الثاني…البرنامج الانتخابي

يقف فوق طابلة بلاستيك ويبدا الخطاب:

– “أيها المواطنون… برنامجي واضح!”
– واحد من لور: “قولنا!”

– “أولاً: نحارب الحفرة!”
– “أي حفرة؟”
– “كامل الحفر! الكبيرة والصغيرة… حتى لي قدّام دار عمّي!”

– “ثانياً: نطوّر النقل!”
– “كيفاه؟”
– “ندير bus ما يوقفش… لي يطلع يطلع، لي يطيح الله غالب!”

– “ثالثاً: نقضي على البيروقراطية!”
– “كيفاه؟”
– “زط بط ها القط…كلشي يمشي فالرمشي!”

الجمهور محتار… يضحك ولا يبكي.

 المشهد الثالث…الحملة الميدانية

يبدا يدور في الحومة:

– يعطي وعود:

• “نمدلكم wifi حتى في القراج!”
• “نزرع شجر يعطي زلابية في رمضان!”
• “نخلي البلدية تخدم 24/24… حتى يوم العيد!”

واحد عجوز يسقسيه:
– “يا ولدي… واش عندك خبرة في التسيير؟”
– الوهراني يرد بثقة:
– “أكيد! أنا نسيّر داري من 15 عام… ومرتي مازالها ما اشتكاتش بزاف!”

– ينطقله واحد آخر: واش من شهادة تملك.

– الوهراني عندي شهادة ميلاد

– واحد شاب قالو و الخبرة

– كان عندي محل لبيع البيتزا.

المشهد الرابع…المناظرة

يدخل في مناظرة مع مترشحين آخرين:

– واحد يقول: “لدينا رؤية اقتصادية…”
– الوهراني يقاطعو:
– “عندي رؤية أنا ثاني… نشوف كلش يتصلّح كي تولّي النية مليحة!”

– الآخر: “سنعتمد مخططًا استراتيجيًا…”
– الوهراني:
– “أنا نعتمد على عمّي بلاحة… عندو معريفة في كل بلاصة!”

 المشهد الأخير…يوم النتائج

يتجمع قدام البلدية… قلبه يدق:

– يعلنوا النتائج…
– الوهراني جاب… 7 أصوات!

يصرخ:
– “مستحيل! أنا صوتت… ومرتي صوتت… وولدي صوت… شكون خان؟!”

ترجع الزوجة:
– “أنا ما صوتّش… كنت مشغولة بالبركوكس حامي يرقص!”

يسكت شوية… ومن بعد يقول:
– “ماشي مشكل… نترشح العام الجاي… ونزيد برنامج: البركوكس إجباري لكل ناخب!”

الخاتمة…
الوهراني ما ربحش البلدية…
لكن ربح لقب جديد في الحومة:
“المرشح الدائم!”